ترکیہ کے پہلے سفیر یحییٰ کمال کی یادگاری تصاویر نمائش کا انعقاد

لاہورآرٹس کونسل اور ترک کلچرل سینٹر کی جانب سے ۲۱دسمبر ۲۰۲۳ء کوپاکستان میں ترکیہ کے پہلے سفیر یحییٰ کمال کی یادگاری تصاویر نمائش کا انعقاد کیا گیا۔نمائش کا افتتاح ڈائریکٹر جنرل ریسکیو 1122ڈاکٹر رضوان نصیر نے کیا ۔ترک قونصل جنرل ، لاہور جناب درمش باغ طوغ نے کلمات تشکر پیش کیے۔ ڈائریکٹر اقبال اکادمی پاکستان ڈاکٹر عبدالروف رفیقی کو خصوصی خطاب کے لیے دعوت دی گئی۔تصویری نمائش میں قائدِ اعظم کے ترکی اور سفارتی تعلقات سے متعلق خطوط و پیغامات بھی آویزاں کیے گئے۔
قونصل جنرل درمش باغ نے نمائش کے انعقاد اور نوجوان نسل کو پاکستان اور ترکی کے درمیان سفارتی اور ثقافتی تعلقات کی شاندار تاریخ کو یاد رکھنے کا موقع فراہم کرنے پر منتظمین کا شکریہ ادا کیا کیونکہ دونوں ممالک نے ہمیشہ آزمائش کی گھڑیوں میں ایک دوسرے کے شانہ بشانہ کھڑے رہے ہیں۔ . یحییٰ کمال کی خدمات کے بارے میں بات کرتے ہوئے کہا کہ ان کا کام مادر وطن اور انسانیت سے ان کی محبت کو اجاگر کرتا ہے، اور ان کی شاعری استنبول سے ان کی محبت کو ظاہر کرتی ہے۔
ڈاکٹر رضوان نصیر نے پاکستان اور ترکی کے تعلقات پر اپنے خیالات کا اظہار کرتے ہوئے یحییٰ کمال کی خدمات کو سراہا۔ انہوں نے کہا کہ پاکستانی ترک عوام کے لیے بھائی چارے کے جذبات کی جڑیں تاریخ میں موجود ہیں۔ انہوں نے کہا کہ "ہم دیکھ سکتے ہیں کہ ہماری تاریخ بنیادی طور پر تعاون کی کہانی ہے، کیونکہ ہم دوست ہیں اور ہم اچھے اور برے وقت میں ایک دوسرے کا ساتھ دیتے ہیں۔" انہوں نے کہا کہ "پاکستان ترکی کے ساتھ اپنے تعلقات کو بہت اہمیت دیتا ہے اور ہمیشہ عوام سے عوام کے رابطوں کے ذریعے ان تعلقات کو مزید بہتر بنانے کا خواہاں ہے۔"
ڈاکٹر عبدالرؤف رفیقی نے اپنے خطاب میں کہا کہ پاکستان اور ترکی کے برادرانہ تعلقات ہیں، جیسا کہ اسلام آباد ہمیشہ اپنے ترک بھائیوں اور بہنوں کے ساتھ رہا ہے۔ میں یہ بات فخر سے کہہ سکتا ہوں کہ ہم دو ملک لیکن ایک قوم ہیں۔ ہمارے دل ترکوں کے ساتھ دھڑکتے ہیں۔ ترک انقلاب میں ہماراخون بھی شامل ہے۔ ہمارے مشاہیر ترک قوم کے ساتھ ہر مشکل کی گھڑی میں شانہ بشانہ کھڑے رہے۔ علامہ محمد اقبال کی شاعری میں ترک قوم کا تذکرہ جابجا ملتا ہے۔اس شاندار نمائش کا بنیا دی مقصد نوجوان نسل تک رسائی اور انہیں برادرانہ تعلقات کی شاندار تاریخ سے روشناس کرانا ہے۔