اقبال اکادمی پاکستان کے زیر اہتمام بین الاقوامی تنازعات کے عالمی دن کے موقع پر ’’بین الاقوامی تنازعات کا حل فکر اقبال کی روشنی میں‘‘کے عنوان سے سیمینار کا انعقاد

اقبال اکادمی پاکستان کے زیر اہتمام بین الاقوامی تنازعات کے عالمی دن کے موقع پر ’’بین الاقوامی تنازعات کا حل فکر اقبال کی روشنی میں‘‘کے عنوان سے سیمینار کا انعقادکیاگیا۔ سیمینار کی صدارت ڈائریکٹر ریسرچ اینڈ انوویشن ،یونیورسٹی آف مینجمنٹ اینڈ ٹیکنالوجی ڈاکٹر عابد شیروانی نے کی۔ مہمانِ اعزاز ماہر اقبالیات ڈاکٹر وحید الزمان طارق تھے۔ کلمات تشکر ڈائریکٹر اقبال اکادمی پاکستان ڈاکٹر عبدالرؤف رفیقی نے پیش کیے۔ نظامت کے فرائض جناب زید حسین نے انجام دئیے۔
صدر تقریب، ڈاکٹر عابد شیروانی نے اپنے خطاب میں عالمی تنازعات کی شدت پر روشنی ڈالتے ہوئے کہا کہ علامہ اقبال کے افکار آج کے دور میں تنازعات کے حل کے لیے بہترین رہنما اصول ہیں۔ انہوں نے زور دیا کہ اقبال کا فلسفہ خودی اور تصّورِاتحاد عالمی سطح پر امن اور استحکام کی بنیاد بن سکتا ہے۔مہمان اعزاز، ڈاکٹر وحید الزمان طارق نے اپنے کلیدی خطاب میں اقبال کے افکار کو بین الاقوامی تنازعات کے حل سے جوڑا۔ انہوں نے کہا کہ اقبال کا نظریہ حق و باطل کی جنگ اورعالمی تنازعات جیسے فلسطین، کشمیر، اور افغانستان کے مسائل کو سمجھنے کے لیے بہت مفید ہے۔
ڈاکٹر عبدالرؤف رفیقی نے کلمات تشکر پیش کرتے ہوئے کہا کہ اقبال اکادمی عالمی امن کے لیے اقبال کے افکار کو فروغ دینے کے لیے پرعزم ہے۔ اقبال کی شاعری عالمی امن کی طرف راغب کرتی ہے۔ اقبال کا پیغام آج بھی عالم اسلام کے لیے ایک روشن ستارہ ہے۔تقریب کے اختتام پر ڈاکٹرعبدالرؤف رفیقی نے تمام مہمانوں کو اعزازی شیلڈز پیش کیں۔ سیمینار میں طلبہ، اساتذہ، سفارتی شخصیات، اور ادبی حلقوں سے تعلق رکھنے والے افراد نے بڑی تعداد میں شرکت کی۔