پاکستانی زبانوں میں علامہ اقبال کی کتب کے تراجم کی نمائش

مادری زبانوں کے عالمی دن کے موقع پر اقبال اکادمی پاکستان کے زیر اہتمام اور نمل یونیورسٹی کے تعاون سے 21 فروری کو ایوان اقبال کمپلیکس میں نمائش کتب منعقد کی گئی۔
اس نمائش میں اقبال اکادمی پاکستان اور دیگر اداروں کی جانب سے شائع کردہ علامہ اقبال کی کتب اوران کے افکار کے مختلف پاکستانی زبانوں میں تراجم پیش کیے گئے۔
نمائش کے افتتاح میں نمل یونیورسٹی لاہور کیمپس کے ریجنل ڈائریکٹر بریگیڈیئر (ر) ہمایوں ضیاء چیمہ، نمل یونیورسٹی کے فیکلٹی اراکین، اقبال اکادمی پاکستان کے شعبہ ادبیات کے سربراہ ڈاکٹر طاہر حمید تنولی ، شعبہ آئی ٹی کے سربراہ محمد نعمان چشتی ، انچارج انتظامیہ وقار احمد اور دیگر افسران موجود تھے۔طلبہ، اہل علم اور محبین اقبال کی کثیر تعداد نے نمائش دیکھی۔