دگرگوں ہے جہاں ، تاروں کي گردش تيز ہے ساقي

دگرگوں ہے جہاں ، تاروں کي گردش تيز ہے ساقي
دل ہر ذرہ ميں غوغائے رستا خيز ہے ساقي
متاع دين و دانش لٹ گئي اللہ والوں کي
يہ کس کافر ادا کا غمزئہ خوں ريز ہے ساقي
وہي ديرينہ بيماري ، وہي نا محکمي دل کي
علاج اس کا وہي آب نشاط انگيز ہے ساقي
حرم کے دل ميں سوز آرزو پيدا نہيں ہوتا
کہ پيدائي تري اب تک حجاب آميز ہے ساقي
نہ اٹھا پھر کوئي رومي عجم کے لالہ زاروں سے
وہي آب و گل ايراں ، وہي تبريز ہے ساقي
نہيں ہے نااميد اقبال اپني کشت ويراں سے
ذرا نم ہو تو يہ مٹي بہت زرخيز ہے ساقي
فقير راہ کو بخشے گئے اسرار سلطاني
بہا ميري نوا کي دولت پرويز ہے ساقي